Аляксандр Аляксандравіч Даброцін (20 снежня 1904 — 15 лістапада 1985) — савецкі акцёр, рэжысёр і педагог. Заслужаны дзеяч мастацтваў РСФСР (1958)
| Аляксандр Аляксандравіч Даброцін | |
|---|---|
| Дата нараджэння | 20 снежня 1904 |
| Месца нараджэння | |
| Дата смерці | 15 лістапада 1985 (80 гадоў) |
| Прафесія | тэатральны акцёр, тэатральны рэжысёр, тэатральны педагог |
| Тэатр | |
| Член у | |
| Узнагароды | |
Біяграфія правіць
Нарадзіўся ў Яраслаўлі (Расія). Захапленне тэатрам пачалося яшчэ падчас вучобы ў гімназіі. З 1918 г. займаўся ў Пралетарскай драматычнай студыі пры Яраслаўскім драматычным тэатры, якую ў 1919 г. узначальваў будучы заснавальнік, мастацкі кіраўнік і дырэктар Дзяржаўнага рускага драматычнага тэатра БССР У. Кумельскі. Дэбютаваў у спектаклі «Выгнаннікі» Ю. Тарыча. У 1925 г. закончыў студыю камернага драматычнага мастацтва ў Ленінградзе. Аляксандр Даброцін працаваў акцёрам у тэатрах Ленінграда, Ташкента, Душанбэ і іншых гарадоў. З 1939 г. займаўся таксама рэжысурай. Узначальваў тэатры ў Мурманску, Ніжнім Ноўгарадзе, Уладзівастоку, Курску, Варонежы.
У гады Вялікай Айчыннай вайны быў удзельнікам франтавой брыгады, якая давала канцэрты на франтах Карэльскага і Варонежскага напрамкаў, а таксама ў тылавых шпіталях і гарнізонах.
У 1966—1968 гг. А. Даброцін працаваў галоўным рэжысёрам Дзяржаўнага рускага драматычнага тэатра БССР імя М. Горкага. На яго сцэне ён дэбютаваў у якасці акцёра ў спектаклі «Шостага ліпеня» М. Шатрова (1966), дзе з поспехам выканаў ролю У. І. Леніна. Крытыка высока ацаніла ігру А. Даброціна, адзначыўшы, што акцёрам удала схоплены асобныя ленінскія рысы — кіпучая энергія, імклівасць, уменне хутка ўспрымаць, ацэньваць акалічнасці і неадкладна прымаць рашэнні.
Зацікавіў гледача спектакль «Падарожнік без багажу» Ж. Ануя, пастаўлены рэжысёрам у 1969 г. Ён пашырыў рэпертуарныя межы тэатра, дапамог раскрыццю рэжысёрскіх і акцёрскіх індывідуальнасцей. Акцёры атрымалі магчымасць паспрабаваць свае сілы на новым і цікавым драматургічным матэрыяле, а гледачы — пазнаёміцца з некаторымі бакамі жыцця французскага грамадства.
Аляксандр Даброцін ажыццявіў пастаноўкі спектакляў «Любоў Яравая» К. Транёва (1967), «Захавай май тайну» В. Сабко і «Дурнічка» Лопэ дэ Вэгі (абодва 1968), «Ворагі» М. Горкага (1970). Ён быў кіраўніком пастаноўкі «Вяселле на ўсю Еўропу» А. Арканава і Р. Горына (1966, рэжысёр Ю. Арынянскі). У сваіх спектаклях рэжысёр дабіваўся ад акцёраў дакладнасці сацыяльных і псіхалагічных характарыстык персанажаў, пераканаўчага раскрыцця сутнасці вобразаў.
У рэжысёрскай дзейнасці А. Даброцін імкнуўся да спалучэння сцэнічнай задумы і ўвасаблення п’есы з яе жыццёвым грунтам і аўтарскай воляй, да суладдзя тэатральнай існасці з натуральнай прыродай чалавечага існавання. Звычайна сваю творчую ідэю ў спектаклі вырашаў праз выканаўцаў, разам з тым рабіў выразныя метафарычныя акцэнты, звяртаўся да сімвалічнай пантамімы ў сцэнаграфіі. Карыстаўся прыёмамі агітацыйна-плакатнага мастацтва, часам з некаторымі прыкметамі сацыялагізму. Для мастацтва А. Даброціна характэрны высокая грамадзянскасць, дакладнасць задумы, нястомны пошук новых выразных сродкаў.
У 1971—1975 гадах Аляксандр Даброцін выкладаў у Беларускім дзяржаўным тэатральна-мастацкім інстытуце. З выпускным курсам паставіў разам з Т. Аляксеевай спектакль «Горад на світанні» А. Арбузава. У 1975—1982 гг. выкладаў у Мінскім інстытуце культуры. З’яўляецца аўтарам мемуараў, якія часткова надрукаваны ў часопісу «Нёман», 1983, № 6.
Член Беларускага саюза тэатральных дзеячаў з 1946 года.
Спасылкі правіць
- Аляксандр Аляксандравіч Даброцін на сайце анлайн-энцыклапедыі «Беларусь у асобах і падзеях»